Gasogi United FC yabonye itike yo gukomeza muri 1/4 cy’Igikombe cy’Amahoro nyuma yo kunganya na AS Muhanga igitego 1-1 mu mukino wo kwishyura wa 1/8. Ikipe ya Gasogi yatsindiye gukomeza ku kinyuranyo cy’ibitego 3-1, kuko mu mukino ubanza yari yatsinze ibitego 2-0.
Uyu mukino wabaye kuri uyu wa Kabiri, tariki 18 Gashyantare 2025, kuri Kigali Pelé Stadium, witabirwa n’abafana bake, kuko amakipe yombi atari afite izina rikomeye mu mupira w’amaguru.
AS Muhanga yatangiye umukino isatira cyane, ishaka igitego cy’early, nyuma yo gutsindwa 2-0 mu mukino ubanza. Ku munota wa 13, yabonye amahirwe akomeye ubwo Mutebi Rashid yageragezaga gutsinda ku mupira yahawe na Hakizimana Adolphe, ariko ntiyabasha kuwushyira mu izamu.
Gasogi United na yo yagerageje gusatira, ariko umunyezamu wa AS Muhanga yakomeje kugaragaza ubuhanga bwe, akuramo imipira ikomeye irimo ibiri yari iteretswe na Kokoete Udo Ibiok.
Ku munota wa 33, AS Muhanga yafunguye amazamu binyuze kuri Mutebi Rashid, watsinze igitego nyuma yo gusiga ba myugariro ba Gasogi United. Iki gitego ni cyo cyajyanye amakipe yombi kuruhuka, AS Muhanga ifite icyizere cyo gukomeza.
Mu gice cya kabiri, AS Muhanga yakomeje gushaka igitego cya kabiri, cyane ko Ntwari Assouman yageze mu rubuga rw’amahina agatera ishoti rikomeye, ariko umupira unyura gato ku ruhande rw’izamu.
Gasogi United yaje kwishyura ku munota wa 72, ubwo Alioune Mbaye yatsindaga igitego cyiza, amaze gucenga abakinnyi ba AS Muhanga bari mu rubuga rw’amahina.
Umukino warangiye amakipe yombi anganyije igitego 1-1, ariko Gasogi United igera muri 1/4 cy’Igikombe cy’Amahoro kuko mu mikino yombi yatsinze AS Muhanga ku giteranyo cy’ibitego 3-1.
