Itabi ni kimwe mu bintu bikoreshwa cyane ku isi, ariko abantu benshi barinywa batazi neza cyangwa badashobora gusobanura neza ingaruka zaryo. Abantu benshi bemeza ko Barinywa “gake”, bavuga ko ribamara stress, ariko burya n’iyo urinyoye rimwe na rimwe, bishobora kugira ingaruka mbi ku buzima bwawe.

Dore ibintu by’ingenzi ugomba kumenya ku kunywa itabi:

1. Unywa Itabi nubwo wowe ubwawe wibwira ko utarinywa.

Hari abantu bavuga ngo: “Njya ninywera agatabi rimwe na rimwe iyo ndi mu birori”, cyangwa “sinari nsanzwe ndinywa , nari ndi kumwe n’inshuti.” Abo bose burya batangiye inzira mbi.

Nubwo urinyoye rimwe mu cyumweru cyangwa rimwe mu kwezi, itabi rigira ingaruka ku bihaha n’umutima utitaye ku bwinshi cyangwa incuro  urinywaho.

2. Wibwira ko Itabi rya “Electronic” (e-cigarette/Vape) ridafite ingaruka.

Hari benshi babona ko gukoresha “e-cigarette” cyangwa “vape” bidatera ikibazo. Ariko burya si byo. Ibyo byose bikurura umwotsi ujyana nikotine n’izindi ntungamubiri zishobora kwangiza ubwonko, umutima, n’ibihaha. Nubwo bitagira umwotsi mwinshi nk’itabi risanzwe, bigira ingaruka ku buzima .

3. Unywa itabi uri kumwe n’abandi—ariko bose baba babangamira ubuzima bwawe

Niba ukunda kuba ahari abantu banywa itabi, uba urimo guhumeka umwuka wanduye (passive smoking). Uwo mwuka w’itabi uba ufite uburozi bwinshi kandi ushobora kwangiza ubuzima nk’aho warinyoye ubwawe.

Ni cyo gituma abana cyangwa abagore batwite bashobora kurwara nubwo bo ubwabo baba batarinywa.

4. Ingaruka z’Itabi ku buzima bwawe.

Itabi rigira ingaruka nyinshi ku buzima, harimo:

• Indwara z’ibihaha: nk’inkorora idakira, igituntu, cyangwa kanseri y’ibihaha.
• Indwara z’umutima: itabi rituma imitsi y’amaraso iziba, bigatera umutima kurwara.
• Kanseri zitandukanye: ku kanwa, igifu, umwijima, urwagashya, n’izindi.
• Kugabanuka k’ubudahangarwa: guhora kwa muganga  kenshi, kwivuza  ntubashe gukira vuba.
• Gusaza vuba: uruhu ruba rucitse intege, iminkanyari ikaza kare, uruhu rw’umaganye.
• Kubura ubushobozi mu mibonano mpuzabitsina (impotence) ku bagabo.

5. Ushobora Guhagarika Itabi!

Kureka itabi birashoboka kandi bitangira kugirira akamaro umubiri wawe ako kanya. Nyuma y’amasaha make urihagaritse:

• Umwuka wawe utangira guhumeka neza
• Ibara ry’amenyo ritangira kugaruka
• Umutima utangira gukora neza
• Ukagira ubushake bwo gukora siporo
• Ugasubirana ubushobozi bwo kwishimira ubuzima

Niba warinywaga utekereza ko nta kibazo ritera cyangwa warinywaga “gake”, menya ko ingaruka zabyo zishobora kukugeraho utabitekerezaga. Iyo uhisemo guhagarika, uba uhisemo ubuzima.

Tangira none, shaka ubufasha niba bikugoye, kandi ube intwari mu guhindura ubuzima bwawe.Ubuzima bwawe ni ubwagaciro. kureka itabi ni intambwe ikomeye mu kugira ubuzima bwiza.